អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ឱ្យដឹងថាអង្គការសុខភាពពិភពលោកទើបបានប្រកាសនូវការរកឃើញវីរុសកូរ៉ូណាបំប្លែងថ្មី២ទៀតគឺ B.1.640 និងB.1.1.529 ដែលជាប្រភេទវីរុសដែលអង្គការពាររាងកាយរបស់មនុស្សពិបាកក្នុងការតទល់ និងមានលទ្ធភាពក្នុងការរីករាលដាលលឿន។

លោកស្រីអំពាវនាវដល់ពលរដ្ឋឱ្យបន្តអនុវត្តវិធានការការពារ និងប្រុងប្រយ័ត្នជានិច្ចពីជំងឺកូវីដ-១៩ ជាពិសេសត្រូវអនុវត្តវិធានការ៣ការពារ ៣កុំ ឱ្យបានខ្ជាប់ខ្ជួន។

លោកស្រីថា៖ «ឆ្លៀតក្នុងឱកាសនេះខ្ញុំសូមធ្វើការអំពាវនាវដល់បងប្អូនប្រជាពលរដ្ឋយើងទាំងអស់ យើងដឹងហើយថាវីរុសនេះធ្វើចរាចរណ៍នៅពេលណាមានដំណើរឆ្លងកាត់ឬក៏ការធ្វើចរាចរណ៍របស់មនុស្ស។ កាលណាការធ្វើចរាចរណ៍របស់មនុស្សមកពីគ្រប់ទិសទីច្រើន អញ្ចឹងលទ្ធភាពនៃការចម្លងក៏វានឹងអាចមាន» ។

បើតាមលោកស្រី ឱ វណ្ណឌីន វីរុសកូរ៉ូណាបំប្លែងថ្មីទាំងពីរប្រភេទនេះត្រូវបានរកឃើញនៅក្នុងទ្វីបអាហ្រ្វិក និងបានរកឃើញនៅទីក្រុងហុងកុងកាលពីម្សិលមិញ។ វីរុសទាំងពីរប្រភេទនេះទើបត្រូវបានអង្គការសុខភាពពិភពលោកកំណត់នូវប្រភេទរបស់វាកាលពីថ្ងៃទី២៤ ខែវិច្ឆិកា ឆ្នាំ២០២១កន្លងទៅ៕